ማይክል ጃክሰን ለሞት የሚያደርስ መጠን ያለው መድሃኒት ወስዶ ነበር

ባለፈው ሰኔ ወር ላይ የሞተው የፖፕ ሙዚቃ ንጉስ ማይክል ጃክሰን ለሞት የሚያደርስ መጠን ያለው ከባድ አደንዛዥ መድሃኒት ወስዶ እንደነበር ቢቢሲ ዘገበ፡፡ ዘፋኙ ወስዶታል የተባለው ፕሮፖፎል የተሰኘ ከባድ ማደንዘዣ መድሃኒት መሆኑ ታውቋል፡፡

የሎሳንጀለስ ፖሊስ ለማይክል ጃክሰን ዶክተር፤ ዶ/ር ሙሬይ ቃለ መጠይቅ ያደረገ ሲሆን ተጠርጣሪ ተብለው ግን እንዳልተፈረጁ ዘገባው ያመለክታል፡፡

የማይክል ሞት የተፈጥሮ ሞት እንዳልሆነ የሚገልፁ ሪፖርቶች አሉ፡፡ ይህ በትክክል ያልተረጋገጠ ቢሆንም ኦስሽየትድ ፕሬስ ስሙን ያልጠቀሰውን ፖሊስ እንደ ምንጭ ጠቅሶ ሪፖርቱን ፅፎታል፡፡

ፕሮፖፎል የተሰኘው ከባድ ማደንዘዣ መድሃኒት በቀዶ ህክምና ወቅት የሚሰጥ ሲሆን ጭንቀትንና መረበሽን ለመቀነስም ባነሰ መጠን ሊሰጥ ይችላል፡፡

የማይክል ዶክተር የሆኑት ሙሬይ ምንም የተሳሳተ ነገር እንዳልሰሩ የገለፁ ቢሆንም ባለፈው ወር የዘፋኙን ሞት ተከትሎ የፖሊስ መርማሪዎች ቡድን የዶክተሩን ቢሮዎች ፈትሸዋል፡፡

የጃክሰንን እንቅልፍ ማጣት ችግር ለማከም ፕሮፖፎል የተሰኘውን ማደንዘዣ ሰጥተውት እንደነበር ዶክተሩ ለፖሊስ በሰጡት ቃል አረጋግጠዋል፡፡ ይሁንና ማይክል ጃክሰን በመድሃኒቶች ሱስ ከመጠመድ እንዲወጣ አማራጭ መድሃኒቶችን በመስጠት ሊረዱት ይችሉ እንደነበር መረጃዎች ጠቁመዋል፡፡

ማይክል በሞተ ማግስት ዶ/ር ሙሬይ ሪፖርት እንዳደረጉት እንደ አማራጭ የተሰጡት ሌሎች መድሃኒቶች አልሰራ ካሉ በኋላ ፕሮፖፎል የተሰኘውን ማደንዘዣ መድሃኒት በትንሹ ሰጥተውት እንደነበር ገልፀዋል፡፡ ሆኖም በተደረገው ምርመራ በዘፋኙ ሰውነት ውስጥ የተገኘው የመድሃኒቱ መጠን ለሞት የሚያደርስ መሆኑ ተረጋግጧል፡፡

ሎስአንጀለስ ታይምስ ከስፍራው እንደዘገበው ዶክተሩ ማደንዘዣውን ከሰጡት በኋላ ስልክ ሊያናግሩ ወጥተው ነበር፡፡ ዶክተሩ ወደ ቤት ሲመለሱም ማይክል መተንፈስ አቁሞ ነበር፡፡